Kreu i Prokurorisë së Posaçme Anti Korrupsion (SPAK), Altin Dumani, gjatë raportimit në Kuvendin e Shqipërisë, ka listuar problemet me të cilat është përballur SPAK-u gjatë vitit që e lamë pas. Ai teksa ka treguar se është bërë shqetësuese numri i lartë i procedimeve të mbartura nga vitet e kaluara.
Dumani gjithashtu tha se deri në fund të këtij viti, prokurorët duhet të përqendrojnë energjitë e tyre në përmbylljen të dosjeve të pashqyrtuara.
“Kemi vuajtur mungesën e infrastrukturës. Kemi punuar 3-4 prokurorë në një zyrë. Edhe administrata, por kjo problematikë tashmë mund të konsiderohet e zgjidhur, pasi na është vënë në funksion një tjetër godinë”, është shprehur Dumani.
Pra, një tjetër problem, që pritet të zgjidhet në ambientet e reja të marra me qira e që do t’i vihen në funksion SPAK-ut është edhe mungesa e infrastrukturës.
Njëkohësisht, kreu i SPAK-ut foli për mungesën e ekstradimeve të persona në kërkim, që qëndrojnë në Emiratet e Bashkuara Arabe, duke shfrytëzuar faktin se mes dy vendeve nuk ka marrëveshje për ekstradime.
Gjithashtu, Dumani vëri në dukje edhe problemin e pagave, duke kërkuar paga më të larta për ekspertët e provave digjitale.
“Mungesa e ekstradimit të eksponentëve të krimit, kryesisht nga Emiratet Arabe, që ka vënë në vështirësi. Procedurat e ekstradimit vazhdojnë, por s’kemi asnjë të ekstraduar nga Emiratet e Bashkuara Arabe dhe Statusi financiar jo i kënaqshëm i ekspertëve të provave digjitale. Ne kemi një laborator, por trajtimi i tyre financiar lë për të dëshiruar. Kemi frikë se mund të na largohen”, ka shtuar ndër të tjera Dumani gjatë raportimit vjetorë.