Zvogëlimi i pranisë policore në ndërtesat komunale në veri të vendit, është kërkesa të cilën Kosova është pajtuar të zbatojë, ka thënë BE-ja për Dukagjinin.
Në një përgjigje për Dukagjinin, nga BE-ja kanë deklaruar se emisari Lajçak dhe zëvëndëskryeministri Bislimi diskutuan përgjigjen e Kosovës ndaj kërkesave të BE-së për depërshkallëzimin e situatës në veri të Kosovës.
“Ata diskutuan përgjigjen e Kosovës ndaj kërkesave të BE-së për depërshkallëzimin e situatës në veri të Kosovës, organizimin e zgjedhjeve të parakohshme lokale në 4 komunat veriore dhe kthimin në zbatimin e Marrëveshjeve të Dialogut, sipas deklaratës së BE27 të 3 qershorit. Ata ranë dakord për hapat e parë prioritar të Kosovës në të gjitha këto 3 fusha. Këto përfshijnë zvogëlimin e menjëhershëm të prezencës së policisë brenda dhe përreth ndërtesave komunale, Kosovën që kryen rregullisht vlerësime të përbashkëta të sigurisë me EULEX-in dhe me KFOR-in sipas rastit, për të vlerësuar mundësinë e zvogëlimit të mëtejshëm të kësaj pranie, duke mos ndërmarrë asnjë lëvizje që mund të përshkallëzojë situatën dhe nxitjen për zgjedhje të parakohshme lokale, si dhe vendosjen e bazës së nevojshme ligjore”, kanë thënë nga BE.
Ndryshe, bëhet e ditur se BE ka ftuar kryenegociatorët e dialogut Kosovë-Serbi javën e ardhshme në Bruksel.
“EUSR-ja ka ftuar kryenegociatorët në Bruksel javën e ardhshme, për të vazhduar diskutimet mbi zbatimin e Marrëveshjes së re për Rrugën e Normalizimit dhe aneksin e zbatimit të saj, me shpresën që palët të bien dakord për hapat e ardhshëm që mundësojnë zbatimin e plotë të Marrëveshjes. fillojë pa vonesë të mëtejshme’, kanë thënë nga BE.
Tashmë, Qeveria e Kosovës ka treguar se ka rënë dakord që zvogëlimi i pranisë policore përreth ndërtesave komunale të bëhet në masën e 25 për qind.
Pika e dytë përfshin vlerësimin e gjendjes nga KFOR e EULEX, si dhe mbajtjen e zgjedhjeve në katër komunat në veri pas verës.