Për t’i futur brenda komunave kryetarët e porsazgjedhur në atë kohë u desh ndihma e pjesëtarëve të Policisë së Kosovës.
Por rrugën jashtë për ta, tani qeveria po e përcakton me një udhëzim administrativ.
Një ditë pasi doli në publik, për të ka folur Ministri Elbert Krasniqi, gjatë një vizite në komunën e Lipjanit, ku tha se grupi punues, ka afat 1 muaj kohë për përfundimin e tij.
I njëjti, sipas Krasniqit, nuk vlen ekskluzivisht për kryetarët e veriut, derisa është pyetur edhe për situata hipotetike, kur peticionet, nuk do të nënshkruheshin e Lista Serbe nuk do të merrte pjesë në zgjedhje.
Megjithatë, kritikat nuk kanë munguar nga opozita për veprimin e ministrisë që drejtohet nga Krasniqi, që e konsiderojnë si zmbrapsje.
“Ju kam treguar që në fillim se Albin Kurti ka me u tërheq nga veriu, sepse kudo që deri sot ka hy është tërhequr”, ka thënë Bekim Haxhiu, deputet i PDK-së.
Njohësi i rrethanave politike në vend, Abit Hoxha, thotë se situata e krijuar për më shumë se dy muaj, nuk ka shkuar aspak në favor të vendit.
“E vetmja punë pozitive në krejt këtë situatë është që e kemi marr vesh që nuk duhet me marr vendime të pakoordinume kështu që me ju përgjigj asaj pyetjes së Kryeministrit pra “me koordinim” përndryshe Kosova nuk ka asnjë përfitim prej gjithë kësaj sharade të organizume”, ka deklaruar Hoxha.
Gjatë së martës, Ambasadori i Shteteve të Bashkuara të Amerikës në Kosovë, Jeffrey Hovenier, ka thënë se presin nga Qeveria e Kosovës të përmbushë zotimet e saj dhe të lejojë mbajtjen e zgjedhjeve të reja në katër komunat veriore.
Po ashtu, Hovenier ka theksuar edhe kërkesat që u janë dhënë udhëheqësve të Listës Serbe për të marrë pjesë në zgjedhjet e reja, gjatë qëndrimit të tyre në Uashington javën e kaluar.