Presidentja e Kosovës, Vjosa Osmani, pas pranimit të ftesës nga Emir Sheikh Tamim bin Hamad Al Thani, Emiri i Katarit, ka udhëtuar në shtetin e Katarit. Osmani do të pritet nga zyrtarët e lartë të shtetit dhe do të marrë pjesë në Forumin e Dohas.
Përgjatë Forumit të Dohas, Presidentja Osmani do të jetë njëra ndër folëset kryesore dhe ndërkohë do të takohet me përfaqësues nga shtetet e tjera pjesëmarrëse.
Vizitës së Osmanit do t’i bashkangjitet edhe zëvendëskryeministrja e Qeverisë së Kosovës dhe njëkohësisht Ministrja e Punëve të Jashtme, Donika Gërvalla.
Kësaj radhe, Forumi i Dohas do të fokusohet në aleancat gjeopolitike dhe mardhëniet ndërkombëtare, sistemin financiar dhe zhvillimin ekonomik, mbrojtjen kibernetike dhe sigurinë ushqimore, si dhe ndryshimet klimatike dhe qëndrueshmërinë.
Forumi i Dohas është një platformë globale e funksionalizuar qysh nga viti 2000, në fushën e çështjeve ndërkombëtare bashkëkohore dhe platoforma më e madhe globale për diplomacinë, dialogun dhe diversitetin.
Më 7 janar të vitit 2011, Katari u bë vendi i 73-të që njohi pavarësinë e Kosovës.