Përfaqësuesi special i BE-së për Kosovën, Tomas Szunyog, ka thënë se procesi i integrimit në BE është shumë i gjatë dhe i komplikuar, dhe se ata që synojnë të integrohen duhet të bëjnë punë të madhe.
Szunyog në prezantimin e Barometrit të Reformave të BE-së, nga Grupi për Studime Juridike dhe Politike (GLPS) dhe Instituti i Kosovës për Politika Evropiane, ka thënë se reformat duhet të bëhen për një gjyqësor të pavarur dhe duhet të ketë luftë kundër krimit të organizuar dhe korrupsionit.
“Kosova nuk është përjashtim. Kosova meriton një shërbim publik jo të politizuar. Në fushën e sundimit të ligjit Kosova duhet të shtojë numrin e gjyqtarëve dhe të prokurorëve … Në luftën kundër korrupsionit, Kosova duhet të bëjë përpjekje më të qëndrueshme që të bëjë hetime më efektive”, ka theksuar Szunyog.
Ai ka thënë se Kosovës i nevojitet edhe diversifikimi i ekonomisë.
Ai ka thënë se këto nuk janë fjalë boshe dhe se bashkimi politik dhe ai financiar e tregojnë këtë.
“E ardhmja e Ballkanit Perëndimor është në Bashkimin Evropian dhe se këto nuk janë fjalë boshe, bashkimi politik dhe financiar tregojnë këtë zotim, procesi i integrimit është proces shumë i gjatë dhe i ndërlikuar. Ata që aspirojnë për të qenë anëtarë duhet të jenë të dedikuar dhe të bëjnë punë të madhe”, tha ai.