Kryeministri i Kosovës, Albin Kurti, ka shpallur liberalizimin e vizave për qytetarët e Kosovës si një sukses të punës intensive të Qeverisë së tij në dy vjetët e fundit.
Në platformën X, kryeministri Kurti ka thënë se veçanërisht pas dy viteve të punës intensive dhe pritjes së gjatë, liberalizimi i vizave do të hyjë në fuqi më datën 1 janar.
Për të përgatitur qytetarët për këtë ndryshim të madh, ai ka njoftuar edhe se Qeveria ka nisur një fushatë informuese në lidhje me rregullat e udhëtimit pa viza.
“Pas një pritje të gjatë dhe shumë punë të vështirë, përgjatë veçanërisht të 2 viteve të fundit, liberalizimi i vizave për qytetarët e Kosovës po vjen më në 1 janar. Sot, së bashku me partnerët tanë, filluam një fushatë informuese mbi rregullat e udhëtimit pa viza, për t’i përgatitur qytetarët tanë për atë që është në horizont”, ka shkruar Kurti në platformën X.
After a long wait & much hard work, esp. over the past 2 years, visa liberalization for 🇽🇰 citizens is finally coming Jan. 1. Today, together w/ our partners we kicked off an information campaign on the rules of visa-free travel, to prepare our citizens for what’s on the horizon. pic.twitter.com/JUas0tbkAG
— Albin Kurti (@albinkurti) October 5, 2023
Me liberalizimin e vizave, qytetarët e Kosovës do të kenë mundësinë të udhëtojnë në shumë vende të BE-së pa nevojën e një vize të veçantë.
“VV-ja na ka lënë 7 vjet pa liberalizim të vizave”
Gjatë ditës së enjte kryeministri Kurti, ka lansuar fushatën për liberalizmin e vizave në sheshin “Skënderbeu”, në Prishtinë.
E kjo fushatë e Qeverisë është kritikuar nga deputetja e LDK-së, Hykmete Bajrami, e cila ka thënë se partinë në pushtet “na ka lënë shtatë vjet pa liberalizim të vizave, sot kanë fytyrë me dalë me bë fushatë për liberalizim”.
Ndërkaq, më 18 prill, Parlamenti Evropian (PE) miratoi vendimin për liberalizimin e vizave për qytetarët e Kosovës.
Rregullat e reja mbi heqjen e regjimit të vizave për Kosovën do t’i lejojnë qytetarët të udhëtojnë në BE pa viza për një periudhë qëndrimi prej 90 ditësh në çdo periudhë 180 ditore.
Kosova, aktualisht, është vendi i vetëm në Ballkanin Perëndimor, qytetarët e të cilit nuk mund të lëvizin lirshëm në zonën Schengen.