Shefi i Grupit Parlamentar të Lidhjes Demokratike të Kosovës (LDK), Arben Gashi, ka theksuar se për herë të parë në historinë e parlamentarizmit në Kosovë, kryeministri refuzoi t’u përgjigjej pyetjeve të deputetëve të opozitës, që, siç ka shtuar ai, kjo është shkelje e Kushtetutës.
Ai e ka konsideruar këtë veprim si një tentativë për të ushtruar presion dhe detyrim ndaj deputetëve, duke e cilësuar atë të papranueshëm dhe të pasiguruar për sistem.
“Sot për herë të parë në parlamentarizmin e Kosovës, refuzon të përgjigjet pyetjeve të deputetëve të opozitës. Kjo është shkelje e rëndë e Kushtetutës dhe shantazh. Ky tentim për detyrim ndaj deputetëve është i papranueshëm. Po hyjnë në një sistem të paraparë”, ka deklaruar Gashi në një konferencë për media të premten.
Gashi ka shtuar se sjellja e sotme është një shqetësim serioz për shëndetin e demokracisë në Kosovë dhe ka akuzuar Qeverinë për mungesën e numrave të mjaftueshëm për të miratuar marrëveshjet ndërkombëtare në parlament.
Ai ka theksuar se zgjidhja e kësaj çështjeje është në dorë të kryeministrit Albin Kurti dhe të Qeverisë së tij, dhe ka lënë hapur mundësinë për zgjerimin e koalicionit ose kthimin e deputetëve të opozitës në parlament.
Në anën tjetër, deputetja e Partisë Demokratike të Kosovës (PDK), Ganimete Musliu, ka reaguar ndaj vendimit të kryeministrit Albin Kurti për të mos iu përgjigjur pyetjeve të opozitës në parlament.
Ajo ka cilësuar këtë vendim si një akt diktature dhe ka theksuar se nuk do të lejojnë që diktatura të vendoset në Kosovë.
Musliu ka treguar se pyetjen parlamentare që kishte planifikuar ta bënte për një deputet tjetër nuk do ta realizojë për shkak të mungesës së kryeministrit.
“Kjo është diktaturë, por s’do të lejojmë që të instalohet diktatura këtu. Pyetjen parlamentare e kam bërë për Xhelal Sveçlën, por meqë Xhelal Sveçla s’ka ardhë me protestu e me ia majtë zhagun Albin Kurtit këtu, unë pyetjen s’po e bëj, por po i bëj thirrje Xhelal Sveçlës, mblidhe kabinetit nga ‘Belvedere’ e bire në Prishtinë, e leje policinë të qetë t’i kryejnë detyrat e tyre”, ka deklaruar Musliu.
Deputetet LDK-së dhe të AAK-së kanë lëshuar sallën e Kuvendit të Kosovës, pasi kryeministri e ministrat kanë refuzuar t’u përgjigjen pyetjeve parlamentare të deputetëve që s’i kanë votuar marrëveshjet ndërkombëtare.