Gëzim Shala nga IKD-ja, në emisionin “Rreth e Rrotull” në RTV Dukagjini, për dosjen e Prokurorisë për përleshjen fizike në Kuvend, ka thënë se tashmë kanë një aktakuzë për të cilën kanë raportuar.
“Siç është pritur atë ditë kur ka ndodhur më 13 korrik rrahja në Kuvendin e Republikës së Kosovës, është ditur se kjo çështje do të jetë objekt i trajtimit nga ana e prokurorit të Shtetit dhe që tashmë kemi një aktakuzë për të cilën kemi raportuar”, ka thënë Shala.
Shala ka thënë se tashmë ka një aktakuzë ndaj zëvendëskryeministrit Bislimi dhe tre deputetëve të PDK-së.
“Aktakuza në rastin konkret e ngarkon z.Bislimi dhe z.Lushtakun me veprën penale të sulmit, z.Beqën me veprën penale të asgjësimit apo dëmtimit të pasurisë, derisa z.Haxhiu ngarkohet me veprën penale të lëndimit të lehtë trupor”, ka thënë tutje ai.
Shala ka shtuar se përtej dosjes së Prokurorisë, pamjet e rrahjes në Kuvendin e Republikës së Kosovës janë jashtëzakonisht shqetësuese, duke shtuar se po flasin për institucionin më të lartë ligjvënës në vend.
“Është një mesazh i keq, negativ që çështjet e tyre të brendshme duhen të trajtohen pastaj nëpër procedura penale nga ana e Prokurorit të Shtetit”, ka shtuar Shala nga IKD-ja.