Kryeprokurori, Blerim Isufaj, ka deklaruar se ai e ka dhënë pëlqimin për tërheqjen e urdhërarresit për Milan Radojçiqin në vitin 2021, ndërsa ka shtuar se arsyet e këtij veprimi janë të ndërlidhura me çështjet e hetimit dhe nuk mund të bëhen publike.
Pra, kryeprokurori Isufaj ka refuzuar të japë detaje arsyet e këtij vendimi, duke e vlerësuar si çështje të ndjeshme të hetimit.
“Pa miratimin tim nuk do kishte mundur të ndodhte, unë e kam dhënë pëlqimin, por arsyet pse e kam dhënë s’mund t’i bëj publike. Këto janë çështje të ndjeshme, çështje të hetimit. Nuk mundet me ditë opinioni secilën situatë, çfarë ne bëjmë”, ka thënë ai.
Ai ka theksuar se vendimet e Prokurorisë Speciale janë të bazuar në hetim dhe nuk duhet të ndikohen nga opinioni publik.
“Sa i përket tërheqjes së urdhërarrestit, është çështje komplet brenda Prokurorisë Speciale, dhe nuk mund të japim detaje. Ai nuk ka qenë kurrë në paraburgim është tërhequr urdhërrarresti, që më pas i është rikthyer,” ka thënë kryeprokurori Isufaj në një konferencë për media.
Isufaj ka bërë të ditur se aktualisht ka urdhërarrest aktiv për Milan Radojçiqin.
“Nuk preferoj të flas për rastet që i kemi në hetim, por po, ka urdhërarrest [për Radojçiqin]. Është bërë me urdhër të Prokurorisë Speciale. Prokuroria Speciale ka qenë pjesë e zhvillimeve dhe hetimeve në veri, e kemi bë punën tonë”, ka deklaruar tutje ai.
Në lidhje me mosndërmarrjen e hapave për ngritjen e aktakuzës në rastin e Banjkës, kryeprokurori Isufaj ka pohuar se “Nuk mund t’na tregojë askush se kur duhet të ngritët aktakuzë. Këto janë çështje të hetimit dhe nuk mund t’i dijë askush.”