Sociologia, Flaka Ymeri, në emisionin “Rreth e Rrotull” në RTV Dukagjini, rreth xhamisë “Mati 1” në Prishtinë, dhe ligjëratës së saj me fëmijët se si nuk duhet festuar Viti i Ri, ka thënë se nuk sheh asgjë të keqe në aspektin religjioz që të festohet kjo festë.
Ymeri e ka quajtur si të gabuar veprimin e lartcekur, sepse, sipas saj, të manipulohet me fëmijë është vepër penale.
“Po të isha unë prindër i atyre fëmijëve, do ta ndjekësha penalisht, sepse ndikimin që mund ta bësh me fëmijët në raport me prindërit e tyre që prindërit të bindën nga fëmijët, kjo i tejkalon kufijtë e njerëzores duke nxitur destabilizim brenda familjes, dhe duke krijuar konflikte të panevojshme”, ka thënë sociologia.
Ajo ka thënë se shoqëria është degraduar duke u manipuluar në aspektin fetar, se a duhet apo jo të festohet Viti i Ri.
“Unë jam rritur në një frymë multietnike, i përkas besimit mysliman. Siç përgatitem për festën e Vitit të Ri, përgatitem për festën e Bajramit apo festat që na takojnë si besimtarë myslimanë”, ka thënë tutje sociologia, Flaka Ymeri.
Ymeri ka përfunduar duke theksuar se manipulimet e tilla janë në kundërshtim me të gjitha normat shoqërore, duke filluar nga përgjegjësia penale, por, mbi të gjitha, atë morale.
Për më shumë informacione, shikoni videon më poshtë: