Kryeministri i Maqedonisë, Dimitar Kovaçevski, në Forumin e Ekonomisë dhe Financave në Shkup (SEFF) ka thënë se për zhvillim ekonomik të rajonit është i domosdoshëm anëtarësimi i Ballkanit Perëndimor në BE.
Kovaçevski ka theksuar se përveç çështjes ekonomike, anëtarësimi në BE me zhvillimet e fundit në Ukrainë, është edhe çështje e sigurisë.
“Lufta në Ukrainë në mënyrën më tragjike të mundshme tregoi se çështja e zgjerimit të BE-së po bëhet çështje serioze e sigurisë për rajonin dhe për vetë Bashkimin Evropian. BE është partneri jonë kryesor në tregti dhe shumica e investimeve direkte vijnë nga Evropa dhe nga kontinenti Amerikano-verior”, ka thënë Kovaçevski.
“Qëllimi ynë është një rajon i fuqishëm ekonomikisht me stabilitet, një Ballkan Perendimor i zhvilluar dhe i integruar në Bashkimin Evropian”, tha mes të tjerash Kovaçevski.