Policia e Kosovës ka dhënë sot detaje të reja për vdekjen e shtetases së Amerikës në Qendrën e Skijimit në Brezovicë.
Në raportin 24-orësh, Policia ka thënë se ekipet e kërkim-shpëtimit e kishin gjetur pa shenja jete skiatoren e huaj në vendin e quajtur “Foleja e Shqiponjës”.
Bashkëshorti i viktimës, shtetas britanik, kishte treguar se kishin qenë duke skijuar së bashku dhe viktima ishte zënë nga orteku i borës.
Me vendim të prokurorit, trupi i pajetë i viktimës është dërguar në IML për obduksion.
“Qendra e Skijimit, Brezovicë 13.02.2024 – 15:35. Një femër shtetase amerikane është gjetur nga ekipet e kërkim-shpëtimit pa shenja jete në vendin e quajtur ‘Foleja e Shqiponjës’. Viktima, sipas bashkëshortit të saj, (shtetas britanik), me të cilin, ishin duke skijuar bashkë, dyshohet se është zënë nga orteku i borës. Me vendim të prokurorit trupi i pajetë i viktimës është dërguar në IML për obduksion”, thuhet në njoftimin e policisë.