Kryeministri i Kosovës, Albin Kurti ka thënë se Kosova vazhdon të jetë e kërcënuar nga ata që duan të pasurohen me luftë dhe armë, duke aluduar kështu në organizatat kriminale serbe që veprojnë në veri të Kosovës.
Kurti ka thënë se ata që janë pasuruar me luftën e fundit në Kosovë, janë kthyer në kriminelë dhe se tani po pasurohen në forma të tjera.
“Ka ende probleme në kufirin me Serbinë. Fatkeqësisht ata që u pasuruan me luftën janë kthyer në kriminelë dhe vazhdojnë të pasurohen me bitcoin, drogë dhe armë. Ata e mbulojnë biznesin e tyre me ide nacionaliste, por janë ende kriminelë”, ka thënë Kurti në një intervistë për agjencinë italiane “AGI”.
Ai më tej ka akuzuar Listën Serbe – partinë më të madhe të serbëve në Kosovë – për lidhje të forta me Serbinë dhe Rusinë.
“Ata flasin për nacionalizëm dhe patriotizëm, por në realitet kanë ide fashiste dhe lidhje me Vuçiqin dhe Putinin”, është shprehur Kurti.
Kreu i ekzekutivit edhe për anëtarësimin e Kosovës në Bashkimin Evropian ka thënë se po bëjnë çmos që ky proces të përshpejtohet.
Kosova e dorëzoi aplikacionin për anëtarësim në BE më 15 dhjetor të vitit 2022, pasi u njoh zyrtarisht nga Komisioni Evropian si shtet ‘kandidat potencial’.
“Nuk jemi ende zyrtarisht kandidat për anëtarësim, por po bëjmë çmos që sa më shpejt t’i afrohemi Bashkimit Evropian”, është shprehur ai.