Mustafë Bajrami vije shpesh tek varri i babait të tij, Dautit, i cili u vra në vitin 1999 nga forcat serbe.
Për 23 vjet, Mustafa nuk u ndal së këtkuari drejtësi.
Në këtë drejtim të enjten pati zhvillime.
Časlav Jolić përfundoi nën pranga të policisë. Ndërkohë , Mustafë Bajrami thotë se atë e njeh mirë atë.
“Këtu janë të dyshuar, jo të dyshuar, por jam 100% i bindur se krimin e kanë kryer familja Popoviq, Peroviq, Peqin dhe Joliq. Këta janë katër familje që e kanë kry ekzekutimin e babait tim”, ka thënë Mustafë Bajrami, i biri i viktimës.
Bajrami që ka dhënë disa dëshmi në Prokurori, AKI e Polici, rrëfen se babai iu ngulfat nga Jolić dhe të tjerët.
“Babai im është i ngulfatur nga paramilitarët, se ata kanë qenë katër persona. Babai është rikthyer në fshat dy ditë pasi janë larguar të gjithë për me i lëshu bagëtitë sepse kanë mbetur të ngujuara. Shtëpitë kanë qenë duke u djegë, të gjithë shtëpitë e lagjes Bajramaj. Ky ka shku për me i liru bagëtitë edhe e kanë zënë dhe e kanë kry ekzekutimin”, u shpreh Bajrami.
E Joliqin thotë se e takoi edhe pasluftës në Istog.
“Ky ka qenë me gjithë babain e vet dhe me vëllain. Kur më kanë vërejtë mua që shkova aty, janë drejtu nga unë dhe erdhën kinse me më përshëndetë. Por, unë i kam injoru e i kam shajtë, gjithçka ju kam thënë dhe nga ai moment asnjëherë më nuk kam dëgju për ta, deri ditën e djeshme”, shtoi ai.
Por, Casalv Joliq përfundoi nën pranga të policisë, papritmas të enjten që lam pas në Istog.
Ai kishte shkuar në objektin e komunës për të marrë një dokument.
Aty zyrtari e ka vërejtur se Joliq është në kërkim nga organet e drejtësisë, prandaj menjëherë i njoftoi ata.
Kështu Joliq u prangos e menjëherë u dërgua në mbajtje.
Prokuroria Speciale që merret me hetimin e krimeve të luftës nuk është deklaruar rreth rastit.
Por një njoftim e ka lëshuar Policia.
“Pas një pune hetimore të kryer nga njësia e Hetimeve të Krimeve të Luftës është identifikuar dhe arrestuar i kërkuari mashkull serb për krime lufte të kryera ndaj popullatës civile në Kosove në periudhën gjatë viteve 1998-1999. I njëjti me vendim të prokurorit dërgohet në mbajtje. Rasti nën hetime”, thuhet në njoftimin e policisë.
Prokuroria Speciale ka bërë kërkesë për caktimin e masës së paraburgimit ndaj të dyshuarit.
Kërkesën e ka aprovuar një gjykatës i procedurës paraprake, në deprtamentin special në Prishtinë.
Ndërkohë, në Istog ka edhe të tjerë që kanë njohuri për të bëmat e Joliq dhe të tjerëve gjatë luftës.
“Časlav Jolići ky ka qenë paramilitar. Ne i kemi pas fqinjë. Jo vetëm ky por edhe Zorani ka qenë polic, polic famkeq. Kështu që kanë marrë pjesë këta, gjatë luftës kanë qenë aktiv në Gurakoc e ndoshta edhe në vende të tjera”, ka thënë qytetari Ndue Musolli.
I arrestuari Joliq gjatë viteve të 90-ta ka jetuar në Gurakoc të Istogut. Pas luftës ai shkoi në Serbi, ku edhe ishte duke punuar si polic në Çaçak.