Gjykata e Apelit ka vendosur t’ua vazhdojë paraburgimin tre fëmijëve të Pëllumb Metës, Hygerta, Hysen dhe Amarildo Metës, pasi akuzohen për vrasjen e babait të tyre më 10 shkurt në Shënavlash të Durrësit.
Apeli ka vendosur të lërë në fuqi vendimin e Gjykatës së Shkallës së Parë në Durrës, e cila vlerësoi të ligjshëm arrestimin e tre fëmijëve të Pëllumb Metës, të cilët akuzohen për vrasjen e babait të tyre.
Kujtojmë se Hysen Meta denoncoi në Komisariatin e Durrësit më 13 shkurt, humbjen e babait të tij. Pas hetimeve të kryera, rezultoi se fëmijët në bashkëpunim me njëri-tjetrin, vranë dhe groposën babanë e tyre.
Hysen Meta akuzohet për veprat penale “Vrasja për shkak të marrëdhënieve familjare”, “Mbajtja pa leje dhe prodhimi i armëve, armëve shpërthyese dhe i municionit”, “Fshehja ose asgjësimi i kufomës” e kryer në bashkëpunim.
Hygerta Meta akuzohet për kryerjen e veprave penale “Vrasja për shkak të marrëdhënieve familjare”; “Fshehja ose asgjësimi i kufomës”, e kryer në bashkëpunim. Dhe Armando Meta akuzohet për kryerjen e veprave penale “Vrasja për shkak të marrëdhënieve familjare”; “Fshehja ose asgjësimi i kufomës”, e kryer në bashkëpunim./ rtsh.al.