Ambasadori i Gjermanisë në Kosovë, Jorn Rohde, ka shprehur shqetësimin e tij ndaj thirrjes së bojkotimit të Listës Serbe për procesin e votimit në veri të Kosovës, për shkarkimin ose jo të kryetarëve të katër komunave.
Ai e ka cilësuar këtë kërkesë si “për keqardhje dhe shkatërrues” për kulturën demokratike dhe kujdesin për jetën e përditshme të qytetarëve.
Ambasadori Rohde ka theksuar se ende nuk është arritur situata kur të gjithë qytetarët të ndihen të përfaqësuar nga kryetarët e katër komunave veriore.
“Bojkoti i kërkuar nga aktorët politikë si Lista Serbe është, siç e kam thënë më parë, për keqardhje dhe shkatërrues kur bëhet fjalë për kulturën demokratike, zgjidhjen e problemeve dhe kujdesin për jetën e përditshme aktuale të qytetarëve”, ka thënë ambasadori Rohde, në një përgjigje për Klankosova.
Ai gjithashtu vuri në dukje përpjekjet e qeverisë kosovare për të paraqitur një proces, që mund të çonte në më shumë përfaqësim nëse do të përdorej nga votuesit.
“Megjithatë, në të njëjtën kohë, qeveria kosovare ka bërë pjesën e saj, duke paraqitur një proces që mund të kishte çuar në më shumë përfaqësim nëse do të përdorej nga votuesit”, ka deklaruar Rohde.
Në lidhje me procesin e votimit të 21 prillit në katër komunat veriore, ku qytetarët serbë votuan për largimin ose mbajtjen e kryetarëve aktualë, procesi dështoi pasi që votuan vetëm 253 qytetarë, ndërsa për të kaluar këtë iniciativë ishte nevoja që të votonin 50% plus një e qytetarëve me të drejtë vote.
Reagime të ngjashme me keqardhje kanë ardhur edhe nga Ambasada e Shteteve të Bashkuara të Amerikës, e cila ka shprehur zhgënjim për rezultatin zgjedhor dhe mosshfrytëzimin e së drejtës së votës nga ana e qytetarëve atje.