Policia e Kosovës e ka arrestuar kryetarin e Partisë Social Demokrate (PSD), Dardan Molliqaj.
Kjo ka ndodhur pas përfundimit të protestës së veteranëve, pjesë e së cilës ishte edhe kryetari i PSD-së.
Në momentin e arrestimit të Molliqajt është parë anëtarja e PSD-së, Natyra Kuqi, e cila u përplas me policët e Kosovës, duke tentuar që ta ndalojë arrestimin e tij.
Ndërkaq, pas arrestimit të kryetarit të PSD-së, janë arrestuar edhe dy përfaqësuesit të tjerë të kësaj partie, Zgjim Hyseni dhe Frashër Kransiqi, për të cilët ende nuk dihet arsyeja e arrestimit.
Ditë më parë, për Molliqajn ishte lëshuar urdhërarrest nga Gjykata, për shkak se ai nuk ishte paraqitur në gjykatë, për rastin e sulmit fizik ndaj deputetit të VV-së, Haki Abazi.
Lidhur me mungesën e të akuzuarit Molliqaj, gjykatësja Vlora Pacolli-Rexhepi kishte thënë se urdhërarresti për të do të jetë aktiv një vjet.
Në seancë kishte munguar edhe i dëmtuari Haki Abazi, për të cilin gjykatësja e rastit Vlora Pacolli-Rexhepi tha se gjykata ka pranuar një parashtresë, përmes së cilës, i njëjti, ka njoftuar se është i angazhuar jashtë vendit.
Molliqaj dhe shoqëruesi i tij akuzohen për sulm ndaj ish-zëvendëskryeministrit Haki Abazi, pas një përleshjeje fizike që kishte ndodhur në mes tyre, në një debat të zhvilluar në televizionin T7, më 11 shtator 2019.