Sot rreth orës 14:00, dyshohet të ketë pasur të shtëna me armë zjarri në “Aktash” të Prishtinës.
Sipas mediumit “EkonomiaOnline”, në rrugën “Gazmend Zajmi”, një punëtor i një picerie është sulmuar nga një person tjetër.
Në pamjet e siguruara nga ta, shihet personi me armë në dorë teksa e kërcënon personin tjetër, duke gjuajtur në tokë e duke e kapur nga fyti.
Disa dëshmitarë i kane thënë Dukagjinit se konflikti mes dy personave ka nisur për çështje trafiku.
Policia ka dalë në vend të ngjarjes, derisa disa burime i kanë thënë Dukagjinit se i dyshuari është arrestuar.
Në një përgjigje për Dukagjinin, zëdhënësja e Policisë për rajonin e Prishtinës, Flora Ahmeti ka thënë se:
“Sot rreth orës 14:20, kemi marrë informatën për gjuajtje me armë zjarri të ndodhur në rrugën “Gazmend Zajmi” në Prishtinë.Menjëherë pas marrjes së informatës policia ka dalë në vendin e ngjarjes dhe ka ndërmarrë të gjitha veprimet e nevojshme që konsistojnë në hetimin e rrethanave që karakterizojnë ngjarjen. Bazuar në të dhënat fillestare, në këtë rast nuk ka persona të lënduar”.
