Gjatë së enjtes misioni paqeruajtës i NATO-s në Kosovë, KFOR, dhe Ushtria e Serbisë kryen një patrullë të sinkronizuar në dy anët e kufirit të Kosovës me Serbinë, pranë komunës së Podujevës.
Ky operacion është pjesë e përpjekjeve të vazhdueshme për të mbështetur sigurinë afatgjatë në të gjithë Kosovën dhe për të ruajtur stabilitetin rajonal, siç theksohet në njoftimin e KFOR-it.
“Këto përpjekje janë pjesë e misionit të përditshëm të KFOR-it për të mbështetur sigurinë e qëndrueshme në mbarë Kosovën dhe stabilitetin rajonal”, thuhet në njoftim e KFOR-it.
Nga ana tjetër, Ministria serbe e Mbrojtjes informoi se patrullimi u realizua në zonën e Shushnjakut, afër Kurshumlisë, e cila është përgjegjësi e bazës ushtarake serbe.
“Janë ndarë informacione për situatën në terren dhe janë mbledhur të dhëna të rëndësishme për zbatimin e detyrave në të ardhmen”, u tha në njoftimin e ministrisë serbe më 26 shtator, transmeton REL-i.