Kryeministri i Kosovës, Albin Kurti, dyshohet të ketë rënë pre e mashtrimit të dy komedianëve të famshëm rusë, të njohur si “Vovan & Lexus”, të cilët njihen për thirrjet e tyre telefonike të falsifikuara me figura të rëndësishme politike.
Në një video të publikuar të martën në platformën Rumble, komedianët pretendojnë se janë prezantuar para Kurtit si presidenti i Letonisë.
Megjithatë, vlen të ceket që mbetet e paqartë nëse kjo video është plotësisht e vërtetë apo nëse është manipuluar apo gjeneruar nga inteligjenca artificiale (IA). deri më tani, nuk ka asnjë konfirmim zyrtar mbi autenticitetin e video. Për këtë Dukagjini ka adresuar pyetje në Qeverinë e Kosovës.
Në videon e publikuar, Kurti shfaqet duke folur në një bisedë online, ku ka diskutuar për çështje të ndryshme, duke përfshirë luftën hibride ndaj tij, opozitën në Kosovë e të tjera.
Në këtë bisedë ka theksuar se Serbia, Rusia dhe “elementë të tyre brenda Kosovës” kanë qenë të përfshirë në përhapjen e dezinformatave kundër tij.
Kryeministri i ka akuzuar partitë opozitare në Kosovë për dhënie të “premtimeve irracionale” dhe për flirtim me luftën hibride. Ai gjithashtu ka përmendur ndikimin e oligarkëve në këto përpjekje kundër tij.
Gjatë bisedës, Kurti ka kritikuar edhe ish-emisarin amerikan për dialogun Kosovë-Serbi, Richard Grenell, duke thënë se ai ka punuar katër vjet kundër tij dhe ka qenë një ndër faktorët që çuan në rrëzimin e qeverisë së tij të parë.
Presidenti i Letonisë, Edgars Rinkēvičs, qëndroi në Kosovë më 20 mars, por nuk ka konfirmime nëse mashtrimi ndodhi përpara apo pas kësaj vizite.
Komedianët rusë “Vovan & Lexus” janë të njohur për mashtrime të tilla dhe më parë kanë arritur të mashtrojnë edhe personalitete botërore si Hillary Clinton, Boris Johnson dhe Kamala Harris.