Kryetari i Aleancës për Ardhmërinë e Kosovës (AAK), Ramush Haradinaj, ka komentuar procesin e formimit të institucioneve të reja së re pas zgjedhjeve të 9 shkurtit, duke thënë se nuk ka entuziazëm të mjaftueshëm për krijimin e qeverisë së re.
Formimi i Qeverisë: Kurti nuk flet por afatet ligjore fillojnë të rrjedhin pas certifikimit
Haradinaj ka përmendur se qeveria në largim dhe kryeministri aktual, Albin Kurti, nuk po nxitojnë të formojnë qeverinë e re, pavarësisht se dolën partia e parë në zgjedhje.
“Hetohet që askush nuk e ka entuziazmin e duhur për të krijuar qeverinë. Së pari hetohet që qeveria në shkuarje, kryeministri në shkuarje, ai që humbi besimin ose shumicën që kishte nuk po nxitohet fare. Përkundër po hetohet një strategji e vonesave e zhagitjes së procesit, e kemi parë me këto ankesat (në PZAP e Supreme). Të gjitha këto janë dëshira e tij me mbetë si ushtrues detyre në qeveri”, ka thënë Haradinaj në Debat Plus.
Haradija ka theksuar se ka një “trembje” nga ana e PDK dhe LDK-së për të marrë përgjegjsinë, për formimin e qeverisë. Ndërsa nga ana e opozitës hetohet një lloj treme me ec përpara. sikurse dini PDK prin, pasuar nga LDK-ja dhe ne dhe Nisma. I takon PDK-së me udhëheq negociatat mes opozitës. Mirëpo po hetohet një treme ë marrjes së përgjegjësive”, ka shtuar Haradinaj.
Deri më tani, pas më shumë se gjashtë javë nga zgjedhjet, Komisioni Qendror i Zgjedhjeve ka certifikuar rezultatet e zgjedhjeve parlamentare të 9 shkurtit.
Lëvizja Vetëvendosje ka fituar zgjedhjet me mbi 390.000 vota, ose 42.30%, duke siguruar 48 ulëse në Kuvend. Partia Demokratike e Kosovës (PDK) ka marrë mbi 190.000 vota (20.95%), duke siguruar 24 ulëse, ndërsa Lidhja Demokratike e Kosovës (LDK) ka marrë mbi 170.000 vota (18.27%), duke siguruar 20 ulëse. Koalicioni AAK-Nisma ka siguruar 8 ulëse me mbi 66.000 vota (7.06%).