Në një përgjigje për RTV Dukagjini, zëdhënësi i Qeverisë së Kosovës, Arlind Manxhuka, ka thënë se deklaratat e presidentit të Serbisë, Aleksandër Vuçiq, janë pjesë e një lufte speciale dhe hibride.
Sipas Manxhukës, qëllimi i Vuçiqit ishte të tërhiqte vëmendjen e mediave drejt deklaratave të tij, në vend se te zhvillimet diplomatike të Kosovës.
“Qëllimi i Vuçiqit ishte që të merren mediet me deklaratën e tij në një lufte speciale e hibride tipike për UDB-në famëkeqe, në vend se me mikpritjen që i bëri Presidenti Francez Emannuel Macron Kryeministrit të Kosovës Albin Kurti në këtë vizitë të frytshme me takim e drekë pune dyorëshe”, ka thënë Manxhuka.
Ai shtoi se kjo qasje synon të zhvendosë fokusin nga avancimi i marrëdhënieve ndërkombëtare të Kosovës dhe të minimizojë rëndësinë e angazhimeve diplomatike në nivel të lartë.
Sot në mengjes presidenti i Serbisë, Aleksandar Vuçiq kishte deklaruar se kryeministri i Kosovës, Albin Kurti do t’i paraqesë dy kërkesa gjatë takimit me presidentin francez, Emmanuel Macron. Ai tutje tha se Kurti do të kërkojë largimin e forcave të NATO nga veriu i Kosovës, si dhe mbështetjen e Francës për vendosjen e Forcës së Sigurisë së Kosovës në atë zonë.
Vuçiq thotë se Kurti do të takohet me Macronin, dhe “pritet të paraqesë dy kërkesa të rrezikshme”