Presidenti i Shteteve të Bashkuara të Amerikës, Donald Trump, ka publikuar një imazh të montuar të vetes në rrjetin social Truth Social, ku shfaqet me armë në dorë dhe syze aviatori, i shoqëruar me mesazhin: “Nuk jam më ‘djali i mirë’”.
Në të njëjtin postim, Trump i është drejtuar Iranit, duke kritikuar qasjen e tyre në negociata, shkruan CNN, transmeton Dukagjini.
“Irani nuk po arrin të rregullojë situatën. Nuk dinë si të nënshkruajnë një marrëveshje jo-bërthamore. Më mirë të bëhen më të zgjuar shpejt”, ka shkruar ai.
Ky reagim vjen në një kohë kur bisedimet për përfundimin e konfliktit mes Shteteve të Bashkuara të Amerikës, Izraelit dhe Iranit mbeten të bllokuara.
Ndërkohë, Irani pritet të paraqesë një propozim të rishikuar për përfundimin e luftës tek ndërmjetësit në Pakistan në ditët në vijim.
Zhvillimet e fundit vijnë pasi Trump ka sinjalizuar se nuk do të pranonte një version të mëhershëm të marrëveshjes, i cili parashihte rihapjen e Ngushticës së Hormuzit, duke lënë për negociata të mëvonshme çështjet që lidhen me programin bërthamor të Teheranit.
