Video-loja e njohur “Call of Duty: Black Ops 2” është shitur në më shumë se tetë milionë kopje përmes PlayStation Store që nga muaji korrik, duke u bërë një nga lojërat më të shitura të këtij viti.
Interesant është fakti se “Call of Duty: Black Ops 2” është publikuar si një portim i versionit origjinal të vitit 2012 në rezolucion 1080p, pa ndryshime të mëdha. Megjithatë, kjo nuk i pengoi lojtarët ta blinin masivisht.
“Black Ops 2” nuk ishte e vetmja lojë klasike e serisë Call of Duty që u soll në konzolat PS4 dhe PS5. Edhe pjesa e parë u publikua në të njëjtën ditë, pa paralajmërim, duke shtuar edhe tre milionë kopje të shitura për Activision dhe Xbox. Në total, të dy portimet e reja të Black Ops janë shitur në më shumë se 11 milionë kopje në PS4 dhe PS5, pavarësisht fushatës “No Disc, No Buy”.
Vetëm pak ditë pasi Sony njoftoi se do t’i japë fund prodhimit të disqeve për PlayStation, më 9 korrik në PlayStation Store u shtuan papritur “Black Ops” dhe vazhdimi i tij. Sipas raportit të kompanisë Alinea Analytics, vetëm “Black Ops 2” ka gjeneruar rreth 325 milionë dollarë të ardhura në platformën e re.
Së bashku me mbi 110 milionë dollarë të ardhura nga pjesa e parë, të ardhurat totale arrijnë në 435 milionë dollarë, para zbritjes së komisionit prej 30 për qind që merr Sony. Në praktikë, Xbox arriti të publikojë një nga lojërat më të shitura të vitit 2026 vetëm duke portuar dy tituj të epokës së PS3 në PS4 dhe PS5.
Alinea Analytics krahasoi suksesin e këtyre portimeve me lojën e sapodalë “Assassin’s Creed: Black Flag Resynced”. Remake-u i Ubisoft, i rindërtuar nga e para, thuhet se është shitur në mbi 1.5 milionë kopje për PS5 gjatë korrikut, ose rreth gjysma e shitjeve të portimit të “Call of Duty: Black Ops” të vitit 2010 në të njëjtën periudhë. Ndërkohë, “Black Ops 2” e ka tejkaluar ndjeshëm këtë lojë, duke shitur potencialisht më shumë se gjashtë milionë kopje shtesë përmes PlayStation Store.
Të dhënat tregojnë se portimet e dy lojërave Black Ops, megjithëse bazohen në tituj gati 15-vjeçarë, kanë qenë më të suksesshme jo vetëm se shumë lojëra të tjera AAA në PlayStation, por edhe më të njohura se “Call of Duty: Black Ops 7” dhe “Call of Duty: Warzone” së bashku.
Më 16 korrik u raportua se “Black Ops” dhe “Black Ops 2” kishin arritur rreth 6.8 milionë lojtarë vetëm në SHBA, një shifër shumë e lartë për lojëra që kushtojnë 40 dollarë dhe që nuk janë as remasterizuar e as ribërë.
Duhet theksuar se Alinea Analytics përdor metoda dhe mjete të veta për të vlerësuar shitjet e lojërave në platforma të ndryshme. Kjo do të thotë se shifrat mund të mos jenë plotësisht të sakta, por vlerësimet e kësaj kompanie zakonisht janë shumë pranë të dhënave zyrtare dhe konsiderohen të besueshme. /Telegrafi