Autoritetet hungareze do të fundosin në mënyrë të kontrolluar dy barka në lumin Danub, në përpjekje për të rritur nivelin e ujit pranë centralit bërthamor Paks dhe për të shmangur ndaljen e një prej dy turbinave që vazhdojnë të jenë në funksion.
Kryeministri hungarez, Peter Magyar, bëri të ditur se masa emergjente do të ndërmerret të shtunën, ndërsa niveli i Danubit vazhdon të bjerë për shkak të thatësirës së rëndë.
Centrali Paks aktualisht po funksionon me rreth 25 për qind të kapacitetit, pasi nivelet rekord të ulëta të Danubit kanë kufizuar sasinë e ujit që mund të përdoret për sistemin e ftohjes së centralit.
Sipas Magyarit, parashikimet tregojnë se niveli i lumit mund të arrijë pikën kritike në orët e hershme të së hënës. Nëse kjo ndodh, njëra prej dy turbinave që vazhdojnë të funksionojnë do të duhet të ndalet.
“Danubi po tërhiqet. Mbytja e kontrolluar e barkave do të fillojë së shpejti”, shkroi Magyar në Facebook.
Qeveria hungareze kishte njoftuar më herët se planifikon ndërtimin e një strukture të zhytur, të ngjashme me një digë, në shtratin e lumit për të menaxhuar rrjedhën dhe nivelin e ujit pranë centralit. Megjithatë, ndërtimi i saj pritet të zgjasë disa javë.
Si zgjidhje e përkohshme, dy barka me gjatësi rreth 80 metra secila do të fundosen pranë centralit. Autoritetet synojnë që përmes kësaj ndërhyrjeje të rrisin përkohësisht nivelin e ujit dhe të mundësojnë vazhdimin e funksionimit të dy turbinave derisa të përfundojë struktura në shtratin e Danubit.
Nivelet jashtëzakonisht të ulëta të Danubit po shkaktojnë probleme edhe në vende të tjera të rajonit. Rumania fqinje mbylli të enjten reaktorin e saj të fundit funksional për shkak të nivelit të pamjaftueshëm të ujit.
Thatësira e zgjatur ka nxitur njëkohësisht debat në Hungari dhe Rumani mbi mënyrën se si centralet bërthamore, të varura nga sasi të mëdha uji për ftohje, mund t’u përshtaten kushteve gjithnjë e më ekstreme klimatike.