Kur u takuan, ishin të pajtimit se situata ka nevojë për zgjidhje urgjente.
Por urgjenca, të paktën për momentin, duket se ka mbetur vetëm në deklarata.
Albin Kurti e Lumir Abdixhiku ende nuk i kanë mbledhur strukturat e partive të tyre për të diskutuar emrin e presidentit të ri, ndonëse këtë e kishin paralajmëruar publikisht.
Madje sa i përket kësaj teme, kreu i Lidhjes Demokratike të Kosovës tha të enjten se nuk ka asnjë risi.
“S’kam asnjë lajm të ri për besë, ju njoftoj me kohë kur kemi zhvillime të reja”, ka thënë Abdixhiku.
As tek Lëvizja Vetëvendosje deri në mesditë nuk pati mbledhje të brendshme për konsultime.
Nga partia thanë se deri sot nuk ka pasur mbledhje të ngjashme dhe se çdo zhvillim do të bëhet publik me kohë.
E derisa mes dy liderëve pritet takimi i radhës, i cili pretendon t’i jap epilog situatës, nga shoqëria civile thonë se ritmi i veprimeve politike nuk përkon me urgjencën aktuale.
“Tashmë edhe në rast të konstituimit të Kuvendit, sado që kjo do të jetë diskutabile në aspektin kushtetues, rrjedhja e afatit 60-ditor, nënkupton që afati I fundit për presidentin do të jetë në mesin apo fundin e muajit tetor, që është dy deri në tri javë pas skadimit të afatit të u.d të presidentit, që nënkupton Albulena Haxhiu, apo kushdo që zgjedhet kryetar i ri i Kuvendit, në rast se do të kemi konstituim të Kuvendit”, ka thënë Eugen Cakolli nga KDI.
Në rast të dështimit për të arritur një marrëveshje për zgjedhjen e Presidentit, sipas Eugen Cakollit nga KDI, vendi do të hyjë në krizë të rrezikshme kushtetuese.
“Juridikisht as nuk do të kishim fare instancë me kapacitet kushtetues për ta shpallur datën e zgjedhjeve e lërë më për të kryer procedurat e tjera dhe për të garantuar funksionimin kushtetues të institucioneve, prandaj ka qenë e nevojshme që çështja e presidentit të trajtohet më me urgjencë sesa që është bërë deri më tani”, ka shtuar Cakolli.
Tashmë duket se vetëm VV dhe LDK janë në përpjekje për të zgjedhur presidentin konsensual, për shkak se sërish të enjten, Partia Demokratike e Kosovës ka ripërsëritur se më nuk janë të interesuar për takime me kryeministrin në detyrë, Albin Kurtin.