Irani dhe Omani kanë paraqitur një propozim për krijimin e përbashkët të një korridori të përkohshëm detar përmes Ngushticës së Hormuzit, pas disa javësh negociatash për stabilizimin e lundrimit në këtë rrugë strategjike.
Sipas një deklarate të përbashkët të ministrive të Jashtme të dy vendeve, Teherani dhe Muscati kanë diskutuar një “kornizë të fazuar” për krijimin e korridorit të përkohshëm dhe pastrimin e minave detare në zonë.
Palët pritet të vijojnë negociatat me synimin për të arritur një marrëveshje për një korridor të përhershëm detar dhe për mënyrën e administrimit të ardhshëm të Ngushticës së Hormuzit, shkruan CNN, transmeton Dukagjini.
Ministri i Jashtëm i Omanit, Badr bin Hamad Al Busaidi, zhvilloi bisedime në Iran me homologun e tij iranian, Abbas Araghchi. Pas takimit, ai tha se ishte “shpresëplotë” se dy vendet do të mund të njoftonin së shpejti për krijimin e një korridori të përkohshëm.
“Menaxhimi i ardhshëm i Ngushticës dhe një zgjidhje e përhershme do të pasojnë në kohën e duhur”, deklaroi Al Busaidi, duke shtuar se do të zhvillohen diskutime edhe me partnerët rajonalë për të mbështetur paqen, stabilitetin dhe lirinë e lundrimit.
Nga ana tjetër, Araghchi tha se propozimi dëshmonte angazhimin e Iranit për paqen dhe stabilitetin, duke e lidhur atë me diplomacinë e Teheranit me vendet fqinje.
Ngushtica e Hormuzit është kthyer në një pikë kyçe të tensioneve të fundit në rajon dhe në një element të rëndësishëm në negociatat e bllokuara mes Iranit dhe Shteteve të Bashkuara.
Ndërkohë, kryeministri i Katarit, Sheikh Mohammed bin Abdulrahman bin Jassim Al-Thani, zhvilloi një bisedë telefonike me ministrin e Jashtëm iranian për të diskutuar propozimin për korridorin e përkohshëm. Katari ka shprehur më herët mbështetje për përpjekjet e Omanit dhe Iranit për të arritur një marrëveshje lidhur me ngushticën.
Presidenti amerikan Donald Trump deklaroi më herët se të gjitha minat në Ngushticën e Hormuzit ishin hequr ose shpërthyer dhe paralajmëroi se çdo mjet lundrues që do të përpiqej të vendoste mina të reja do të shkatërrohej. Ai tha gjithashtu se SHBA-ja po monitoronte “çdo centimetër katror” të ngushticës.