Drejtoria e Arsimit e Komunës së Prishtinës u është drejtuar me një kërkesë të gjitha shkollave të kryeqytetit, që nesër ora e parë mësimore t’i kushtohet Ushtrisë Çlirimtare të Kosovës, historisë së luftës për çlirim dhe kontributit të çlirimtarëve për liri e shtetndërtim.
Sipas kërkesës së sotme, Drejtoria e Arsimit kërkon që nxënësit të trajtojnë në mënyrë të përshtatshme për moshën e tyre rëndësinë e luftës së UÇK-së, sakrificën e qytetarëve dhe të gjithë atyre që kontribuuan për lirinë e Kosovës, njofton Dukagjini.
Po ashtu, kërkohet që gjatë kësaj ore të trajtohen edhe proceset gjyqësore në Hagë ndaj ish-krerëve të UÇK-së, përfshirë vendimin që pritet të merret nesër.
“Qëllimi i kësaj ore është që nxënësit të njihen me historinë e afërt të vendit tonë dhe të reflektojnë mbi rëndësinë e lirisë, paqes dhe kujtesës historike”, thuhet në kërkesën e Drejtorisë së Arsimit.
