Presidentja e Komisionit Evropian, Ursula von der Leyen, ka deklaruar sot se reformat janë kyçe për ta kthyer ëndrrën evropiane të Shqipërisë në realitet.
Ajo në një postim rrjetin social X, pas takimit me kryeministrin Edi Rama në Tiranë, vlerësoi punën e bërë për procesin e integrimit evropian, duke theksuar rëndësinë e reformave dhe dialogut me shoqërinë.
“I dashur Edi Rama, po punoni fort për ta kthyer ëndrrën evropiane të Shqipërisë në realitet. Përqendrimi te reformat, nga drejtësia te mjedisi, është kyç, ndërsa ruajtja e një dialogu të fortë me shoqërinë është po ashtu e rëndësishme. Objektivi është pranë. Kështu do ta arrijmë”, tha von der Leyen.
Kujtojmë, presidentja e Komisionit Evropian ka nisur sot turin e saj në vendet e Ballkanit Perëndimor. Agjenda e takimeve të von der Leyen në Shqipëri përfshin takimin me presidentin Bajram Begaj dhe kryeministrin Edi Rama.
Ursula von der Leyen nesër do të vizitojë Kosovën, dhe më pas Malin e Zi dhe Maqedoninë e Veriut. Në fokus të agjendës së von der Leyen në kuadër të turit në Ballkanin Perëndimor pritet të jenë marrëdhëniet e BE-së me rajonin dhe procesi i integrimit evropian.