Kryeministri Albin Kurti ka pritur në takim mirëseardhës ambasadorin e ri të Francës, Jean-François Huchet.
Duke i uruar mirëseardhje dhe suksese në detyrën e re, Kurti vlerësoi zhvillimin pozitiv të marrëdhënieve dypalëshe dhe rezultatet konkrete që kanë rritur bashkëpunimin ndërmjet Kosovës dhe Francës, njofton Dukagjini.
Siç bën të ditur Zyra e Kryeministrit, në takim u diskutua për vazhdimin e këtij momentumi dhe thellimin e mëtejmë të bashkëpunimit, me theks të veçantë në Lojërat Mesdhetare 2030, si dhe në fusha si infrastruktura, teknologjia dhe energjia.
Po ashtu thuhet se u diskutua gjithashtu për rrugën evropiane dhe proceset integruese teksa Kurti theksoi rëndësinë e mbështetjes së mëtejme të Francës për avancimin e Kosovës në këto procese.
“Kryeministri Kurti i uroi ambasadorit Huchet mandat të suksesshëm në Kosovë dhe shprehu gatishmërinë për bashkëpunim të ngushtë gjatë mandatit të tij”, thuhet në njoftim.