Kryetari i PDK-së, Bedri Hamza, ka deklaruar se pret që të gjithë deputetët e Kuvendit të Kosovës ta përkrahin të hënën Projektligjin për ndryshimin dhe plotësimin e Ligjit për Dhomat e Specializuara.
Hamza ka bërë të ditur se PDK-ja ka zhvilluar një mbledhje të përbashkët të Grupit Parlamentar dhe Kryesisë së partisë, ku është diskutuar edhe për seancën e së hënës.
“E dini qysh janë dinamikat dhe nesër në seancën e Kuvendit të Republikës së Kosovës do të jetë ligji për plotësim-ndryshimin për Dhomat e Specializuara”, ka deklaruar Hamza para mediave.
Ai ka thënë se ky projektligj është iniciativë e PDK-së dhe se ka marrë edhe mbështetjen e Qeverisë, duke plotësuar kështu kushtet për t’u proceduar në Kuvend.
“Kjo është një iniciativë ligjore e Partisë Demokratike të Kosovës, por e përkrahur masivisht edhe nga qytetarët e Republikës së Kosovës, për çka dëshiroj të shpreh mirënjohjen dhe falënderimin për përkrahjen e këtij projektligji. E ka marrë miratimin edhe nga Qeveria dhe tash i plotëson të gjitha kushtet që të procedohet në Kuvend”, ka thënë ai.
Hamza është shprehur optimist se projektligji do të marrë mbështetjen e të gjithë deputetëve dhe u ka bërë thirrje atyre që ta votojnë.
“Nesër jam optimist se ligji do ta përkrahin të gjithë deputetët dhe i lus dhe i ftoj të gjithë deputetët që të jenë në mbështetje të këtij projektligji”, ka deklaruar Hamza.