Këngëtarja, Shakira ka zgjedhur të gjykohet nga prokurorët spanjollë për akuzat se ajo ka mashtruar qeverinë spanjolle prej afro 15 milionë euro taksa.
Sipas avokatëve të saj, 45-vjeçarja kolumbiane ka hedhur poshtë një marrëveshje të ofruar nga autoritetet spanjolle dhe dëshiron të provojë pafajësinë e saj në gjykatë.
Shakira “i beson pafajësisë së saj dhe zgjedh ta lërë çështjen në duart e ligjit”, ka thënë në një deklaratë firma e saj e marrëdhënieve me publikun Llorente y Cuenca.
Në vitin 2018, prokurorët spanjollë e kanë akuzuar sensacionin e pop-it që qëndron pas hitit të famshëm “Hips Don’t Lie” për dështimin për të paguar 14.5 milionë euro taksa mbi të ardhurat që ajo fitoi midis vitit 2012 dhe 2014.
Shakira mund të gjobitet ose të dërgohet në burg nëse shpallet fajtore për evazion fiskal.
Ndërkaq, prokurorët nuk kanë ofruar detaje të mëtejshme rreth marrëveshjes, e cila mbetet në tavolinë deri në hapjen e gjyqit në Barcelonë, raporton euronews.
Firma e marrëdhënieve me publikun e Shakira-s ka thënë se ajo ka depozituar shumën që thuhet se i detyrohet në Agjencinë Spanjolle të Taksave dhe nuk ka borxhe tatimore në pritje.
Shakira, emri i plotë i së cilës është Shakira Isabel Mebarak Ripoll, ka dy fëmijë me futbollistin e Barcelonës, Gerard Pique. Çifti kanë jetuar së bashku në Barcelonë, por së fundmi i kanë dhënë fund lidhjes së tyre 11-vjeçare.
Shakira, e cila ka shitur më shumë se 60 milionë albume, u nda nga Pique në qershor të këtij viti.