“Përpjekjet e Vuqiçit për destabilizim të Kosovës, i cili po shërbehet me metoda të mentorit të tij- Putinit, do të dështojnë”.
Kështu ka thënë presidentja e Kosovës, Vjosa Osmani, në një postim në llogarinë e saj në Facebook, teksa ka reaguar mbi zhvillimet e fundit në veri të Mitrovicës.
Ajo ka theksuar se masa e reciprocitetit nuk është e drejtuar kundër askujt, por në favor të qytetarëve pa dallim përkatësie.
“Prandaj, ftoj qytetarët serbë të Republikës së Kosovës që të mos bien pre e propagandës nga Beogradi”, shtoi ajo.
Po ashtu, presidentja e vendit ka potencuar se Policia e Kosovës dhe të gjitha institucionet e sigurisë po punojnë shumë për të garantuar respektimin e sundimit të ligjit dhe lirinë e lëvizjes.
“Jemi duke u koordinuar e punuar pandalur me partnerët tanë ndërkombëtarë”, shkroi Osmani.
Ndryshe, Portali Dukagjini nga burime të sigurta ka siguruar informacion se Osmani dhe kryeministri Albin Kurti së bashku me dy zëvendëskryeminsitrat Besnik Bislimi dhe Donika Gërvalla janë në takim me Ambasadorin e Shteteve të Bashkuara të Amerikës(ShBA), Jeff Hovenier.
Takimi është duke u zhvilluar ende në presidencë, por nuk dihen arsyet se për çfarë po mbahet ky takim.
Portali Dukagjini ka siguruar informacione nga burime të sigurta por, nuk ka ende asgjë zyrtare.