Presidentja e Kosovës, Vjosa Osmani, gjatë takimit me ambasadorin e Austrisë në Kosovë, Christoph Weidinger, ka diskutuar për zhvillimet e fundit në Veri të Kosovës.
Në njoftimin për media nga zyra e presidentes, thuhet se Osmani ka kërkuar që Bashkimi Evropian të jetë më i zëshëm karshi tendencave destabilizuese të Serbisë në Kosovë dhe rajon.
“Në takim u diskutuan zhvillimet e fundit në veriun e Kosovës. Presidentja Osmani ka ritheksuar se institucionet e Kosovës janë të përkushtuara ta vazhdojnë koordinimin e plotë me partnerët ndërkombëtarë, ashtu siç janë koordinuar edhe deri më tani”, thuhet në njoftim.
Gjatë takimit me ambasadorin Weidinger, presidentja Osmani ka theksuar se Kosova mbetet e përkushtuar për të kontribuuar për paqen dhe stabilitetin në vend dhe rajon.
Ajo ka theksuar se Kosova pret mbështetjen e vazhdueshme të Austrisë për procesin e liberalizimit të vizave për qytetarët dhe anëtarësimin në organizata ndërkombëtare.
Në kontekst të diskutimit me ambasadorin Weidinger, Presidentja Osmani foli edhe për organizimin e Forumit për Gratë, Paqen dhe Sigurinë, në muajin tetor të këtij viti në Prishtinë.