“Duke filluar nga 1 janari, gjatë 12 muajve të ardhshëm Maqedonia e Veriut do të marrë kryesimin e kësaj organizate të jashtëzakonshme, dhe jam i privilegjuar të marr rolin e kryesuesit të OSBE-së me seli në Vjenë”, ka shkruar në rrjetin e tij social Facebook ministri i Punëve të Jashtme të Maqedonisë së Veriut, Bujar Osmani.
Tutje, Osmani ka treguar se Organizata për Siguri dhe Bashkëpunim në Evropë(OSBE) ka shtrije në tri kontinente dhe është organizata më e madhe rajonale e sigurisë në botë.
“A e dini se OSBE është organizata më e madhe e sigurisë në botë me 57 shtete që përfaqësojnë 1.3 miliardë njerëz në tri kontinente”, ka thënë Osmani.
Organizata për Siguri dhe Bashkëpunim në Evropë (OSBE), e cila ka selinë e saj në Vjenë, është organizata më e madhe rajonale e sigurisë në botë me 57 shtete pjesëmarrëse. Bashkëpunimi i sigurisë dhe parandalimi i konflikteve janë në qendër të punës së tyre.
Çfarë bën OSBE-ja?
Aktivitetet OSBE-së mbulojnë një gamë të gjerë çështjesh sigurie si p.sh. parandalimin e konflikteve për të nxitur zhvillimin ekonomik, përdorimin e qëndrueshëm të burimeve natyrore dhe respektimin e plotë të të drejtave dhe lirive themelore të njeriut.
Ndër qëllimet kryesore të OSBE-së është krijimi i sigurisë gjithëpërfshirëse, parandalimi dhe menaxhimi i konflikteve, mbrojtja e të drejtave të njeriut, standardet demokratike dhe të sundimit të ligjit, çarmatimi, masat e ndërtimit të besimit dhe lufta kundër terrorizmit.