Presidenti i Sllovenisë, Borut Pahor, gjatë vizitës së tij në Kosovë, pas takimit me presidenten e Kosovës, ka thënë se një nga pikat e pakta që nuk pajtohet me presidenten Osmani, është formimi i Asociacionit me Shumicë të Komunave Serbe.
“Kosova dhe Sllovenia kanë qëndrime të përbashkëta por mes neve ka edhe diferenca apo dallime. Një e rrallë është implementimi i marrëveshjeve të arritura në Bruksel. Marrëveshja mes Prishtinës dhe Beogradit, ishte formimi i komunave me shumicë serbe, Vjosës i kam thënë se pres të gjendet një zgjidhje për implementimin e marrëveshjes”, ka thënë Pahor.
Ndërkaq, edhe presidentja e Kosovës, Vjosa Osmani, e pranoi që në këtë pikë kanë dallime me presidentin e Sllovenisë.
Sipas saj, marrëveshja për Asociacionin është në kundërshtim me ligjet e Kushtetutës së Kosovës.
“Kosova ka zbatuar 99% të obligimeve të saj, dhe ekziston një që nuk e ka zbatuar marrëveshja e asociacionit, për një arsye shumë fundamentale sepse ajo marrëveshje bie ndesh me rendin kushtetuese. Gjykata ka gjetur 22 shkelje të asaj marrëveshje. Marrëveshje të tilla janë në kundërshtim me kushtetutën”, ka thënë Osmani.
Osmani, po ashtu tha se shteti i Serbisë, po i përkrah strukturat ilegale serbe në veri të Kosovës edhe pse për një gjë të tillë ishte zotuar në vitin 2013. Sipas saj, me strukturat paralele, Serbia po tenton ta destabilizojë Kosovën dhe po ashtu rajonin.