Charles III është shpallur zyrtarisht Mbret i Mbretërisë së Bashkuar në një këshill aderimi në apartamentet shtetërore të Pallatit “St. James”
Megjithëse ai u bë mbret pas vdekjes të së ëmës, Mbretëreshës Elizabeth II, një takim historik konfirmoi zyrtarisht rolin e tij të shtunën.
“Jam i vetëdijshëm për trashigiminë madhështore, detyrat dhe përgjegjësitë e rënda të sovranitetit që më kanë kaluar tashmë”, ka thënë Charles III në fjalimin e tij.
Ai ka thënë se e di që do të jetë i mbështetur nga dashuria dhe besnikëria e popujve dhe njëherësh, ka thënë se është “thellësisht i inkurajuar nga mbështetja e vazhdueshme e gruas së tij të dashur”.
“Shfrytëzoj rastin të konfirmoj vullnetin dhe synimin tim për të vazhduar traditën e dorëzimit të të ardhurave trashëgimore, përfshirë pasurinë e kurorës, qeverisë sime për të mirën e të gjithëve, në këmbim të grantit sovran, i cili mbështet detyrat e mia zyrtare si kreu i shtetit dhe kreu i kombit”, ka thënë Charles III.
Këshilli i Aderimit, një organ i përbërë nga politikanë të lartë, gjyqtarë dhe zyrtarë, e shpalli atë si monark në Apartamentet Shtetërore të Pallatit.
Shpallja e Charles III si mbret paraqet herën e parë të transmetimit të ceremonisë në televizion.
Përgjatë ceremonisë, Charles shoqërohej nga gruaja e tij Camilla, dhe djali i tij i madh Princi William. William tani është trashëgimtar i fronit dhe njëherësh, Princi i Uellsit.
Pas ceremonisë, një zyrtar do të lexojë me zë të lartë shpalljen nga një ballkon në Pallatin e Shën James, fjalim ky që do të lexohet në qytetin mesjetar të Londrës dhe në vende të tjera në Mbretërinë e Bashkuar.
Mbretëresha e Britanisë së Madhe, Elizabeth II, monarkja më jetëgjatë në historinë britanike dhe nëna e Charles III, ka vdekur në moshën 96-vjeçare.
Mbretëresha mbretëroi për 70 vjet, duke shërbyer si një fener stabiliteti në një kohë të trazuar.