Deputeti i Lëvizjes Vetëvendosje, Ardian Gola, i ka bërë ftesë sindikatës dhe mësimdhënësve që t’i kthehen procesit të rregullt mësimor dhe të vazhdohet dialogu social mbi premisat e artikulimit dhe ushtrimit racional të arsyes.
Në Kuvendin e Kosovës, ku po debatohet për grevën e BSPK-së, Gola ka thënë se nga Qeveria nuk ka barrikadim.
“Dialogu social duhet të ngritet, kërkesat kur bëhen duhet të jenë në nivel të mbështetjes ligjore dhe të artikulimit racional dhe pastaj mund të themi se kemi një lloj relacioni konstruktiv Qeveri me palët e tjera jashtë qeveritare”, ëhstë shprehur ai.
Ai ka potencuar se ka përpjekje për të ngritur nivelin e dialogimit social dhe sipas tij, kërkesat që vijnë nga sindikatat ose grupet e tjera duhet të jenë të mirëplanifikuara dhe argumentuara racionalisht.
“Nuk ka barrikadim nga qeveria, nuk mund të kuptoj se si mund të quhet barrikadim kur qeveria ka bërë lëvizje në drejtim të përmbushjes konkrete të kërkesave sindikale”, shtoi Gola.
“Qeveria Kurti po mendon se duhet të vazhdojë misionin e vet si e majtë progresiste që është edhe në emancipimin social, në ngritjen e nivelit të dialogimit social, për shkak se mënyra se si është dialoguar më herët them se shtetin gjithmonë e kannë vendosur në pozita defansive”, ka thënë Gola.