Presidentja e Kosovës, Vjosa Osmani dhe Zotëriu i Parë, Prindon Sadriu do të marrin pjesë në varrimin e Mbretëreshës Elizabeth II.
Të dielën e 18 shtatorit, presidentja e Kosovës dhe Zotëriu i parë janë ftuar të marrin pjesë në pritjen e organizuar nga Mbreti Charles III për krerët e shteteve dhe bashkëshortët e tyre nga mbarë bota, të cilët do të jenë prezent në varrimin e Mbretëreshës Elizabeth II.
Të hënën e 19 shtatorit, Osmani dhe Sadriu do të jenë prezent në varrimin e Mbretëreshës Elizabeth II, e më pas në pritjen e organizuar nga Sekretari për Punë të Jashtme i Mbretërisë së Bashkuar, James Cleverly.
“Gjatë qëndrimit në Londër, Presidentja Osmani do të takohet edhe me Kryetarin e Dhomës së Përfaqësuesve të Parlamentit Britanik, Sir Lindsay Hoyle”, njofton Zyra e Presidencës.
Presidentja Osmani e ka cilësuar monarken më jetëgjatë në historinë e Mbretërisë së Bashkuar, frymëzim për brezat që vijnë. Në të njëjtën kohë duke ngushëlluar popullin e Mbretërisë së Bashkuar, Osmani ka potencuar se e ndjera i ka ardhur në ndihmë Kosovës në periudhat e vështira.
Të enjtën e tetë shtatorit, Mbretëresha e Britanisë së Madhe, Elizabeth II, monarkja më jetëgjatë në historinë britanike, ka vdekur në moshën 96-vjeçare.
Mbretëresha mbretëroi për 70 vjet, duke shërbyer si një fener stabiliteti në një kohë të trazuar. Vdekja e saj ka shkaktuar një pikëllim të madh në Britani për monarken 96-vjeçare, e cila mbretëroi për 70 vjet.