Skuadra e futbollit të femrave të Spanjës është në një krizë “të paprecedentë” pas një mosmarrëveshjeje mes 15 lojtarëve dhe trajnerit të kombëtares Jorge Vilda.
Grupi i lojtareve kanë kërcënuar se do të largohen nga skuadra nëse Vilda nuk shkarkohet nga federata spanjolle e futbollit.
Lojëtaret kanë thënë që mjedisi i ekipit po ndikonte “seriozisht” në “gjendjen e tyre emocionale” dhe “shëndetin”, sipas një deklarate të RFEF.
Por federata kishte premtuar mbështetjen e plotë për Vildën të enjten e 22 shtatorit dhe kishte hedhur poshtë ankesat, njofton euronews.
“RFEF nuk do t’i lejojë lojtarët të vënë në dyshim vazhdimësinë e trajnerit kombëtar dhe stafit të tij stërvitor, pasi marrja e vendimeve të tilla nuk bie në kompetencën e tyre”.
“Federata nuk do të lejojë asnjë lloj presioni nga asnjë lojtar për marrjen e masave sportive. Kjo lloj manovre është larg nga shembulli dhe jashtë vlerave të futbollit dhe sportit dhe është e dëmshme”, kanë thënë RFEF.
Sipas rregullave spanjolle, lojtarët mund të skualifikohen nga ekipi kombëtar i futbollit për nga dy deri në pesë vjet nëse refuzojnë të luajnë kur thirren.