Për shkak të një borxhi, të hënën e nëntë majit, janë bllokuar xhirollogaritë e kompanisë “MB CONSULTING” së ambasadorit të Kosovës në Kroaci, Martin Berishaj.
Vlera e borxhit është mbi 30 mijë euro, sipas mediave malazeze.
“Të hënën janë bllokuar llogaritë e kompanisë së Berishës në Mal të Zi për shkak të një borxhi prej 31,014 euro”, ka shkruar Press.co.me.
Mediat në Slloveni kanë raportuar se ambasadori i Kosovës në këtë vend dyshohet se është implikuar në një skandal financiar bashkë me kryetarin e Partisë së Lirisë në Slloveni, Robert Golob.
Ambasadori Berishaj dyshohet se e ka shpërlarë mbi 600 mijë euro përmes një kompanie që e kishte hapur në Mal të Zi, e quajtur “MB Consulting”.
Ai kishte reaguar përmes një postimi në Facebook, ku kishte thënë se këto raportime janë shpifje.
“Shpifjet nuk kalojnë! Pavarësisht nga fushata parazgjedhore në Slloveni dhe ballafaqimi i fundit i mbrëmshëm në mes akterëve kryesorë politikë, i z. Janša dhe z. Golob, ku u mohua shkrimi i Planet tv lidhur me emrin tim, nga sot, padia ime kundër portalit në fjalë, hap rrugë për fjalën e fundit gjykatës. Nuk është e drejtë të jemi thjesht të sigurt në drejtësi dhe në të vërtetë. Duhet edhe ta mbrojmë drejtësinë dhe te vërtetën. Përndryshe shpifjet bëhen normale”, kishte shkruar Berishaj në reagimin e tij.
Ndryshe, më 22 prill, sipas mediave sllovene, Berishaj është bërë pjesë e një skeme, ku paratë e dërguara nga një kompani serbe transferoheshin te një kompani tjetër malazeze, pronar i së cilës është ambasadori i Kosovës, Martin Berishaj.
Tërheqja e parave nga ambasadori Berishaj, sipas mediave sllovene, ishte bërë nga dy xhirollogari.
“197 mijë euro i ka tërhequr nga llogaria personale, ndërsa pjesën tjetër, 320 mijë, i ka tërhequr nga një llogari tjetër”, thuhej në mediat sllovene.
Ndërkohë, Berishaj kishte mohuar këto raportime, dhe njëkohësisht kishte paralajmëruar padi për mediumin në fjalë.