Armenia vendos kushte për njohjen e Nagorno-Karabakut si pjesë të Azerbajxhanit

Armenia tha se është e gatshme ta pranojë rajonin e Nagorno-Karabakut si pjesë e Azerbajxhanit fqinj, por nën disa kushte

Kryeministri i Armenisë, Nikol Pashinian. Fotografi nga arkivi.

Armenia tha se është e gatshme ta pranojë rajonin e Nagorno-Karabakut si pjesë e Azerbajxhanit fqinj, por nën disa kushte. Një kompromis i tillë do të ndihmonte që t’i jepej fund konfliktit prej disa dekadash dhe do të ndihmonte në ringjalljen e këtij rajoni të varfër.

Kryeministri i Armenisë, Nikol Pashinian, tha gjatë një konference për media më 22 maj se çdo njohje nga Jerevani i Nagorno-Karabakut si pjesë e Azerbajxhanit do të varej nga garantimi i të drejtave dhe sigurisë së armenëve etnikë, që jetojnë në këtë rajon malor.

Azerbajxhani dhe Armenia kanë mosmarrëveshje lidhur me Nagorno-Karabakun që nga fundi i viteve ’80, kur armenët etnikë, që janë shumicë në këtë rajon, kërkuan që ai të transferohej nga Azerbajxhani sovjetik në Armeninë e atëhershme sovjetike.

Një luftë civile shpërtheu pas kolapsimit të Bashkimit Sovjetik dhe Nagorno-Karabaku shpalli pavarësinë nga Azerbajxhani. Megjithatë, shpallja e pavarësisë nuk është njohur nga shumica e komunitetit ndërkombëtar.

Bakuja rimori kontrollin e një pjese të territorit pas një lufte gjashtëjavore më 2020. Të dyja palët nënshkruan një marrëveshje armëpushimi, që aktualisht monitorohet nga forcat paqeruajtëse ruse.

Megjithatë, marrëveshja nuk ka sjellë paqe në rajon dhe ka pasur përleshje të kohëpaskohshme mes dy palëve. Përleshjet e fundit ndodhën më herët gjatë këtij muaji.

Deklaratat e Pashinianit vijnë një javë pasi ai u takua në Bruksel me presidentin e Azerbajxhanit, Ilham Aliyev. Ky takim u thirr nga Bashkimi Evropian dhe në të u diskutua për arritjen e një marrëveshjeje që do të prodhonte paqe të qëndrueshme.

BE-ja tha se takimi paraqiste një hap pozitiv përpara. Megjithatë, arritja e paqes së qëndrueshme do të kërkonte kohë dhe tejkalimin e mospajtimeve nga opozita në Armeni. /REL

Shija e redaktorit

Lansohet platforma e-Komuna, Kurti: Drejt një qeverisjeje digjitale me fokus...

Ministria e Administrimit të Pushtetit Lokal ka organizuar të premten ceremoninë e lansimit të shërbimeve të e-Komuna, e cila është pjesë e platformës shtetërore...

ASK: Në Kosovë s’ka rënie të madhe të numrit të...

Procesi i regjistrimit të popullsisë në Kosovë përfundon këtë të premte, pas fillimit të tij më 5 prill, rezultatet preliminare të të cilit pritet...

Osmani bisedon me homologun gjerman, diskuton rëndësinë e anëtarësimit të...

Presidentja e Kosovës, Vjosa Osmani, të martën mbrëma ka zhvilluar një bisedë telefonike me homologun gjerman, Frank-Walter Steinmeier. Në një postim në rrjetin social "X",...

Të fundit nga rubrika