Ish-ministrja e Financave dhe ish-ministrja e Arsimit, Hykmete Bajrami nga radhët e Lidhjes Demokratike të Kosovës ka bërë apel që pagat e grevistësve në sektorin e arsimit të ekzekutohen nesër.
Përmes një postimi në Facebook, Bajrami ka rikujtuar se pagat e punëtorëve të administrates tashmë janë ekzekutuar ndonëse, të njëjtit ishin në grevë krahas atyre në arsim.
“Të gjithë ju që po e mbroni Qeverinë për mosekzekutim të pagave për punëtorët e arsimit dhe po thirreni në zbatushemëri të ligjit, a e dini se pagat iu kanë dalë punëtorëve të administratës të cilët po ashtu kanë qenë në grevë gjatë shtatorit? Po besoj të gjithë pajtohemi se: “Më keq se mosbatimi i ligjit është zbatimi i tij në mënyrë selektive”, ka shkruar Bajrami.
Shefja e Grupit Parlamentar të LVV-së, Mimoza Kusari, ka deklaruar gjatë tre tetorit se nuk do të procesohen pagat për punëtorët e sektorit publik, të cilët kanë qenë pjesë e grevës, duke thënë se kështu thotë ligji. Por, pagat nuk janë ekzekutuar as për mësimdhënësit e komunave me shumicë serbe, të cilët nuk janë pjesë e Sindikatës së Arsimit, dhe rrjedhimisht nuk kanë qenë pjesë e grevës së fundit në sektorin e arsimit.
Një gjë të tillë për Portalin Dukagjini e kishte konfirmuar nënkryetari i Komunës së Novobërdës, Bajrush Ymeri, i cili ka thënë se pagat nuk i kanë marrë as mësimdhënësit që ishin pjesë e grevës e as ata që nuk ishin.