Basketbollistja Brittney Griner është deklaruar fajtore për një akuzë droge në një gjykatë ruse të enjten, por mohoi se ajo kishte shkelur qëllimisht ligjin.
Griner po fliste në seancën e dytë të gjyqit të saj për akuzën e narkotikëve që mund ta dënonte me deri në 10 vjet burg, disa ditë pasi ajo i kërkoi Presidentit të SHBA-ve, Joe Biden, të siguronte lirimin e saj.
“Do të doja të pranoja fajin, por nuk kisha asnjë qëllim. Nuk doja të shkelja ligjin,” ka thënë Griner, duke folur në anglisht, e cila më pas u përkthye në rusisht për gjykatën.
“Do të doja të jap dëshminë time më vonë. Më duhet kohë për t’u përgatitur,” ka shtuar ajo.
Seanca e radhës gjyqësore është caktuar për 14 korrik.
Medalistja e artë olimpike është arrestuar në shkurt të këtij viti në një aeroport afër Moskës, ngase në bagazhin e saj iu gjetën disa fishekë që përmbanin vaj të nxjerrë nga kanabisi.
Brittney Griner është një nga lojtaret më të suksesshme në ligën profesionale të femrave në SHBA, me ekipin e WNBA-së, Phoenix Mercury.