Zëvendësdrejtori i Policisë së Kosovës për rajonin e veriut, Veton Elshani, ka thënë se shumë shpejt do të hapet Ura e Ibrit në Mitrovicë. Në një intervistë në “Tëvë1”, Elshani ka theksuar se janë diskutuar me eprorët se si mund të bëhet kjo.
Për këtë janë deklaruar nga zyra e Bashkimit Evropian në Kosovë, të cilët theksojnë se çdo veprim në lidhje me Urën e Mitrovicës duhet të bëhet në kuadër të dialogut.
“Hapja e urës së Mitrovicës është temë e dy marrëveshjeve të arritura nga palët në kuadër të dialogut të lehtësuar nga BE-ja në vitin 2015 dhe 2016. Pavarësisht përpjekjeve të BE-së për lehtësimin ndër vite, ura mbetet e mbyllur për trafik. Duke qenë se kjo është një çështje që i përket dialogut të ndërmjetësuar nga BE-ja, negociatat dhe çdo vendim lidhur me urën duhet të bëhen në kuadër të dialogut me pjesëmarrjen e delegacioneve zyrtare të Kosovës dhe Serbisë”, ka thënë nga zyra e BE-së në Kosova për “Klan Kosovën”.
Në këtë deklarim ftohen palët që të zbatojnë çdo marrëveshje të arritur në dialogun e lehtësuar nga BE-ja.
“BE-ja mbetet e gatshme për të lehtësuar bisedimet. BE-ja gjithashtu u kërkon të gjithëve që të përmbahen nga çdo veprim provokues, që mund të rrezikojë stabilitetin e terrenit dhe të largojë palët nga zbatimi i Marrëveshjes për Rrugën e Normalizimit të Marrëdhënieve – që duhet të jetë prioriteti i tyre kryesor”, thuhet në përgjigjen e tyre.