Presidenti i Shqipërisë, Bajram Begaj ka thënë se Forcat e Armatosura të Republikës së Shqipërisë në këtë 110-vjetor të themelimit, vijnë si një forcë moderne, anëtare e NATO-s dhe aleate e besueshme, e aftë të përmbushë misionin e saj kushtetues dhe detyrimet Euro-Atlantike, e angazhuar në një sërë misionesh në mbrojtje të paqes dhe sigurisë, jo vetëm në vend, por edhe në rajon e në botë.
Ai nëpërmjet një postimi në Facebook, ka thënë se është përjetë mirënjohës arkitektëve të pavarësisë, të cilët në ato ditë të vështira, kur vihej në pikëpyetje ekzistenca e shtetit të sapoformuar, me guxim, mençuri dhe atdhetarizëm të lartë, themeluan një nga shtyllat e domosdoshme të garantimit të pavarësisë së shtetit shqiptar.
Po ashtu, ai ka shtuar se rrugëtimi 110 vjeçar i Forcave të Armatosura ka qenë i vështirë dhe i mbushur me sfida.
“Arritjet e deritanishme janë rezultat sa i përkushtimit dhe mundit të përbashkët, aq edhe i mbështetjes së vyer e të pazëvendësueshme të miqve dhe aleatëve tanë të NATO-s. Mirënjohja dhe vlerësimi ynë është maksimal për ndihmën e dhënë për transformimin, modernizmin, trajnimin, edukimin dhe rritjen e kapaciteteve tona ushtarake, falë bashkëpunimit tonë të ngushtë në tre dhjetëvjeçarët e fundit”, ka shkruar Begaj.
Ndërkaq, Begaj tutje ka thënë se është i bindur që angazhimi dhe detyrimi i tyre do të vijojë të mbetet i shenjtë ndaj atdheut, nderit dhe detyrës.
Forcat e Armatosura të Shqipërisë (FA), u krijuan më 4 dhjetor të vitit 1912, pak ditë pas krijimit të Shtetit të parë Shqiptarë në Vlorë.
Krijimi i Forcave të Armatosurave erdhi si një nevojë e natyrshme e një shteti Sovran, të pavarur dhe që kërkonte të mbronte kufirin e saj nga tundimet e huaja (të shpeshta për shekullin e shkuar).