Presidenti i Shteteve Bashkuar të Amerikës (SHBA), Joe Biden, ka nënshkruar urdhrin që përshpejton procesin e dërgimit të armëve në Ukrainë.
Këto dërgesa të armëve amerikane në Ukrainë do të bëhen përmes një ligji të bazuar në rastin e Luftës së Dytë Botërore, që ndihmoi aleatët amerikanë të mposhtin Gjermaninë naziste.
Në Zyrën Ovale në Shtëpinë e Bardhë, presidenti amerikan nënshkroi Aktin e huadhënies në Uashington, duke thënë se SHBA-të mbështsin “luftën e ukrainasve për të mbrojtur vendin dhe demokracinë e tyre kundër luftës brutale të Putinit”.
Biden kishte pranuar se tashmë janë shpenzuar miliarda dollarë nga Shtetet e Bashkuara, duke shtuar se “përkujdesja ndaj agresionit është edhe më e kushtueshme”, raporton The Guardian.
Akti i huadhënies, që thjeshton rrjedhën e pajisjeve ushtarake, “bazohet në një program të epokës së Luftës së Dytë Botërore për të ndihmuar Evropën, t’i rezistojë Hitlerit”, njoftoi Shtëpia e Bardhë.
Presidenti vuri në dukje se ai po nënshkruante aktin, një ditë pasi Shtetet e Bashkuara dhe Evropa Perëndimore shënuan Ditën e Fitores në Evropë, dhe humbjen e Gjermanisë së Adolf Hitlerit në vitin 1945.
Ai, gjithashtu, nënvizoi se e hëna shënoi përvjetorin e 9 majit – Dita e Evropës, e cila shënon themelimin e Bashkimit Evropian në vitin 1950 dhe krijimin e një “fuqie ekonomike” dhe “forcë globale për paqen”.