Organizata joqeveritare “ETEA” dhe Shoqata e Filozofëve të Kosovës (SHFK) kanë filluar implementimin e filozofisë për fëmijë, me mbështetjen e Zyrës së Presidencës së Kosovës.
Pjesë e këtij programi janë, gjithsej, 18 fëmijë të moshave 6 deri në 12 vjeç.
”Mentori, Taulant Gashi nga Shoqata e Filozofëve të Kosovës, në modulin e parë të programit, temë e së cilit është ‘Etika’, diskutoi me fëmijët rreth ‘Të mirës dhe të keqës’. Pjesa kryesore e takimit ishte tregimi ‘Diçka në ujë’, gjatë të cilit fëmijët shprehen mendimet e tyre lidhur me etikën qytetare”, ka thënë organizata “Etea” përmes një postimi në Facebook.
Duke qenë se në planprogramet e arsimit në Kosovë filozofia për fëmijë nuk bën pjesë, organizata dhe shoqata në fjalë ka filluar modulin e parë të këtij programi, temë e së cilës ishte “Etika”.
Në bazë të hulumtimeve të Oscar Brenifier, implementimi i filozofisë te fëmijët rrit mendimin kritik të tyre.
Një lëndë e tillë është pjesë e shkollave fillore në vende të ndryshme të botës si në Kanadë, Austri, Francë.
Kurse, Estonia dhe Finlanda e kanë të inkorporuar nga klasa e parë në kuadër të lëndëve të tjera.