Florim Grajqevci, dekan i Fakultetit të Ndërtimtarisë, ka thënë se shembja e kulmit të objektit të ri të komunës së Prishtinës të enjten ndodhi si pasojë e faktorëve të ndryshëm.
Sipas tij, janë faktorët e jashtëm si fenomenet natyrore dhe reliefi apo pozita e objektit.
“Dje shembja e kulmit ka ndodhur si rezultat i thithjes së erës dhe jo shtypjes. Kulmet e tilla kur ndërtohen duhet të kenë kujdes sepse luan rol pozita apo reliefi. Duhet të bëhet vlerësim i objekteve”, ka thënë Grajqevci në emisionin “FIVE”.
Sipas tij, duhet të ketë konsultime paraprake në mes të ndërtuesve dhe inxhinierëve që të mos vijnë raste të tilla.
“Standardet për kulme duhet t’i respektojmë dhe ato mësohen në programet e studimit në fakultet, në raste të tilla është mirë që ndërtues të konsultohen me inixhierë që të mos vijnë te situata të tilla”, ka vijuar ai.
Ndryshe, dje, një 23-vjeçare ka pësuar lëndime të rënda gjatë ditës së enjte, pasi e kishin zënë rrënojat e një pjese të kulmit të objektit të komunës në lagjen “Arbëria” në kryeqytet.
Për këtë, komuna e Prishtinës shkaktarë bëri erërat e forta.
Objekti i ri i komunës është ndërtuar në vitin 2009.