Zëdhënësja e Lidhjes Demokratike të Kosovës, Sibel Halimi, ka thënë se pandjeshmëria e qeverisë ndaj qytetarëve, mund të emërohet si goditje e ulët dhe hakmarrje politike e pushtetarëve ndaj qytetarëve të tyre.
“Kjo pandjeshmëri e qeverisë ndaj qytetarëve tanë, e shprehur me kaq lehtësi, nuk ka sesi të emërohet ndryshe veçse goditje e ulët e hakmarrje politike e pushtetarëve ndaj qytetarëve të tyre”, ka thënë ajo.
Tutje, Halimi është shprehur se pushtetarët dalin me krenari në konferenca për të kumtuar lajmin se nuk do të ketë paga për mësimdhënësit, mirëpo nuk e kanë parasysh faktin se familjet po ballafaqohen me probleme të mbijetesës, pasi kishte edhe rritje çmimesh në gjithçka.
Ndërkaq, për këtë çështje ka folur edhe Shefja e Grupit Parlamentar të Lëvizjes Vetëvendosje(VV), Mimoza Kusari-Lila, e cila ka theksuar se, ligji për greva e përcakton saktë kompensimin ose moskompensimin për grevistët.
Deputetja e VV-së ka thënë se me ligjin mbi grevën, parashihet se punëtorët qoftë në sektorin publik apo në atë privat, të cilët janë pjesë e grevës së deklaruar, sipas rregullave të parapara me ligj, nuk kompensohen për ditët të cilat nuk janë në vendin e punës.
“Në bazë të këtij ligji, do të vendoset për ekzekutimin e pagave për grevistët”, ka thënë Kusari-Lila.